【搬屋公司】搬屋公司收費陷阱大公開

【搬屋公司】搬屋公司收費陷阱大公開

上年嘅11月,消委會以一個4人家庭做例子,搵咗20間搬屋公司報價,最後發現佢哋嘅收費差距可以由最平嘅$4,545去到最貴嘅$16,215。究竟點解呢啲搬屋公司係按咩標準去定價嘅呢?每間搬屋公司嘅附加收費係咪一樣呢?等我哋同大家拆解一吓。

1. 搬屋公司收費標準

一般搬屋公司都係以搬運物品嘅數量同種類作基本收費。而每一間搬屋公司嘅收費準則都唔一樣,例如喺消委會嘅報告入面,佢哋向搬屋公司要求搬運同一部37吋電視機,收費由$50至$600不等,差價有成11倍咁多。而一部3門雪櫃嘅收費最大相差4倍,由$100至$500不等。每間公司嘅成本同做法都唔同,收得貴啲嘅可能包埋電器包裝、保護服務等等,詳細嘅做法需要消費者直接向搬屋公司查詢,因為即使您揀咗最平果間都好,如果唔知佢哋個價錢係包咩服務嘅話,有可能到現場時會「借啲意」加您價,到時就唯有硬食。

2. 留意附加費

搬屋公司有好多附加收費,例如傢俬裝拆、轉平台、搬樓梯、棄置傢俬、甚至假日都有可能要另外收費。好多搬屋公司未必會詳細列明每項附加費嘅收費,所以客人要留意返自己有冇機會需要相關服務,如果有嘅話,記得事先同搬屋公司溝通好。踏入資訊科技年代後,搬屋公司嘅收費已經比以前透明得多,因為雙方溝通時多數都係用Whatsapp、Email等方式,客人亦會主動要求搬屋公司出價單,所有服務及收費都有文字紀錄,雙方都有保障。

以下係消委會調查得嚟嘅附加費比較:




傢俬裝拆附加費

20間搬屋公司當中,如果有大型傢俬需要裝拆嘅話,有6間公司會按每件傢俬收取$100至$2,000附加費;另外,有6間公司規定每箱物品都唔可以超過20至25公斤,否則會收取$20至$30附加費或以雙倍價錢計算該箱物品;

樓梯搬運附加費

有11間公司會以每件每層計算,收費介乎$1.2至$1,000;有4間會收取運費總嘅的15%至20%作為附加費;而另1間同樣按運費總額計算嘅公司,就按樓層數量劃一收取每層$500附加費。

大型物件搬運費

對於需要特別搬運技巧嘅物件,例如三角鋼琴,有2間公司表明唔會提供鋼琴嘅搬運服務,有14間就會收取每件每層$100至$5,000附加費。

傢俬及雜物棄置附加費

如果要棄置傢俬或雜物,收費要視乎物件嘅體積及重量而定,由每件$20至$5,000不等。

周末或公眾假期額外收費

如果您安排喺星期六、日或公衆假期搬屋,部分公司會收取$500至$1,200起嘅附加費,亦有公司按運費總額加收10%附加費。

轉乘升降機須額外收費

如果消費者居住嘅屋苑需喺平台轉乘另一部升降機先可以到達目嘅單位,有超過一半公司(12間)會因此而額外收費。如果住所不設升降機,所有搬運公司都會按樓層收取額外樓梯搬運費,但係,各公司對樓層嘅定義都唔同,有搬屋公司以5級樓梯為一層計算,亦有公司以19級樓梯先為一層。


*以上資料數據參考自 消費者委員會