【搬屋師傅】夕陽行業?入行做搬屋好唔好?


搬屋師傅
搬屋師傅

相比起地盤、裝修、水電等技工,搬屋呢一行比較少人認識,甚至係面臨緊青黃不接嘅時期。講人工,唔夠地盤嚟;講辛苦,又可能辛苦過其他工種。所以話,喺呢行見親嘅後生多數都係麻麻地(當然亦總會有啲有心工作,勤奮上進嘅學徒),心態係當做散工賺快錢,冇心學嘢之餘,做嘢又俹簁(音:那西)。事實上又唔可以怪哂佢哋,係本身搬屋呢行都有唔少問題,搞到入行嘅人越嚟越少。

搬屋人工

人工報酬

坦白講,搬屋呢行搵錢一定唔夠地盤多㗎啦,但人工絕對唔可以話低。基本上學徒至少都有$500/日,而師傅就有$800-1000/日左右,如果您係識得拆裝傢俬嘅話,人工會再高啲,實際薪金好視乎經驗同公司而定。包伙食就基本嘅,有啲公司會俾埋OT錢、貼士、搬樓梯附加費等,而呢啲「獎金」係非常普遍嘅。其實呢一行長做一間公司嘅情況唔多,好多師傅會做幾間公司,邊間有job就做邊間,密密做就賺多啲,一個月做足廿五日以上嘅話,一般師傅要搵$30000以上都唔係一件難事。

技巧

好多人會忽略咗搬屋所需要嘅技術。搬屋講求嘅係效率,執嘢搬嘢夠快係基本,點樣將紙箱、傢俬、電器砌好上板車係必需要嘅技術。您喺街度一定見過啲師傅推住一車高過自己嘅貨行,但望落去好似好輕鬆好穩陣咁樣,其實當中包含咗好多物理學嘅知識喺入面,而呢啲技巧全部都係經驗嚟,例如點樣用兩條封箱膠紙拉緊啲貨、點樣分先後次序放落板車、點樣搬個大雪櫃出門口…所有嘢唔係話大力就做得到。

另外一種常見技巧就係裝拆技術。每一款傢俬、電器都有相應嘅裝拆方式,有時拆錯咗嘅話未必裝得返。而識得裝拆嘅師傅人工都可以高啲,呢行亦比較欠缺,所以唔太愁冇工開。

搬屋請人

工時

一般搬屋都係喺日間進行,所以大概返工時間係朝8晚6。如果嗰日早完成的話,就可以提早收工。

需求

香港地閒閒地有過百間搬屋公司,唔少公司最少有一至兩架噸車,證明呢一行係有潛力嘅。最主要嘅原因係香港嘅土地問題,香港地樓價高、租金貴,唔計買樓,好多租客都會每一兩年就搬一次,對搬屋嘅需求當然大。更何況未計搬公司呢條數,唔同搬屋,基本上每一間公司有搬遷需要時都一定要搵搬屋公司幫手。所以搬屋呢行係唔會擔心冇工開,畢竟A公司冇Job時您仲可以搵B公司,而呢一切都係睇您自己嘅實力,做得好嘅又點會愁冇工開呢。

體驗

打工都係搵食,點樣可以喺搵食當中尋找返些少樂趣?網上有個訪問講關於呢行嘅趣事都講得幾真實:搬屋呢行一定會遇到大大小小嘅家庭同公司,亦會見盡社會各階層嘅人,每家每戶各有不同,所以話,做搬屋又點會悶呢?

好多人當搬屋係散工,賺吓快錢就算,抱住呢個心態嘅話,好難真係做到啲咩成績。反而您當係長遠發展,鑽研包裝、裝拆、砌車、甚至帶隊等同搬屋相關嘅技能,相信好快就可以成為一個出色嘅師傅,自己帶隊出嚟搵生意,甚至開公司添!如果您想搵一個可以發展自己一技所長嘅地方,即刻加盟Moving Formula,成為我哋嘅註冊搬運團隊成員之一,向夢想邁進一步!