【搬屋水電煤】新居入伙前有咩嘢係必做?


新居入伙前必做的事情

唔少客人同我哋講每逢搬屋都特別煩!除咗搵搬屋公司之外,仲可能要擇吉日吉時,又要搞清潔買日常用品等等…但事實上唔係個個都在意吉日吉時,日常用品呢啲遲啲買都得啦!咁究竟有咩係必做,唔做就住唔到嘅呢?有搬屋經驗嘅朋友一定知,答案就係水電煤!


搬屋水電煤

除咗人要搬到新屋之外,水電煤嘅地址當然都要跟埋您搬啦!唔通搬走咗之後,仲要幫舊居比水電煤費,新居又冇水電煤用咩!不過今時唔同往日㗎啦,而家呢啲轉地址嘅嘢可以上網搞掂哂!水電嘅轉名/開通服務基本上喺兩三個工作天就搞得掂,而煤氣就可能要多一兩個工作天,因為要等人上嚟抄錶。以下係幾個相關機構嘅網站,禁入去申請終止舊址嘅水/電/煤服務,再開通新址嘅相關服務即可,方便又快捷,十幾分鐘就搞掂哂啦!


水務處網站(食水及鹹水供應):https://www.esd.wsd.gov.hk/esd/main.do

中電網站(電力供應):https://www.clp.com.hk/zh/customer-service/open-and-close-account/open-account

港燈網站(電力供應):https://aol.hkelectric.com/AOL/aol#/eforms/appl

中華煤氣網站(煤氣供應):https://eservice.towngas.com/zh-HK/OpenCloseAccount/EaccountRegistration


仲有樣嘢要提大家嘅,就係記得轉埋寬頻同家居電話服務!方法係致電/登入返您嘅寬頻上網公司網站,申請搬遷服務,而家唔少公司都有包呢項服務,費用全免!申請時記得問清楚啦!


更改住址方法

除咗水電煤要轉地址之外,稅務局、香港郵政、房屋署等等政府機構統統都要通知!如果唔係就收唔到信㗎啦!但係而家真係先進好多好多,只要Click入政府一站通嘅使用地址更改網址( https://bit.ly/2Uj6L2M ),就即刻可以一次過向23個政府部門同7個非政府機構更改地址紀錄,減少好多煩惱!


其實除咗政府部門之外,仲有銀行、保險公司、信用卡公司、子女就讀嘅學校等等機構都要改地址,如果唔係就收唔到佢哋啲通知㗎啦!所以喺搬屋入伙之前,一次過List好有咩公司/機構需要轉地址,咁就清楚好多唔洗怕有咩漏咗啦!