冷氣越來越唔凍?DIY洗冷氣教學


DIY清洗冷氣的教學

每次冬天過後,天氣熱到要開冷氣嗰陣發覺部冷氣機唔夠凍?原來冷氣機都要定期清洗?有冇人話俾您知一年洗一次都唔夠㗎!又有冇人話您知洗冷氣唔洗搵人幫手,自己都可以搞得掂?


定期清洗冷氣機

如果您發現冷氣機越嚟越唔夠凍,未必係部機壽命嘅問題!除咗故障之外,最大機會就係部冷氣機污糟!冷氣機太污糟嘅話會影響出風嘅效果、耗電量增加、甚至有細菌滋生等等!所以定期清洗冷氣機係好重要嘅!好多師傅都話,最好每季都洗一次部機,咁樣可以維持返個效能同埋延長壽命。


洗冷氣機嘅工具

洗冷氣機工具

冷氣機係電器,當然唔可以直接用水洗,而市面上有幾個大牌子都有出「冷氣機清潔劑」,作用溶化機內嘅灰塵,五金舖有得賣,價錢大概係50-70蚊左右。其他嘅工具如下:


1. 冷氣機清潔劑

2. 油掃

3. 噴水壺

4. 抹布


清洗步驟

洗冷氣機步驟

1. 熄電掣

雖然唔係直接用水清洗,但係為免觸電,建議您將電掣熄咗佢,甚至熄埋總掣,咁就最安全啦。


2. 洗隔塵網

無論係窗口式冷氣機定分體式冷氣機,佢哋都會有隔塵網。而隔塵網就係冷氣機第一層隔離嘅工具,所以一定會積落唔少塵。做法就係先拆開冷氣機外殼,然後將隔塵網攞出嚟,一般冷氣機嘅隔塵網都係就咁扣住,所以好易攞到出嚟。


將外殼同隔塵網除出嚟之後,您就可以直接拎去用水喉清洗,其間唔洗用任何清潔劑,沖洗完直接用布抹已經好乾淨,然後放埋一邊晾乾佢。


3. 清潔內部

拆咗隔塵網後您會見到一個金屬嘅機器,呢個叫蒸發器,係用嚟將制冷劑變成低壓飽和蒸氣,令溫度降低。有80%-90%隔塵網阻隔唔到嘅灰塵都係走咗入嚟,所以您要先用油掃將大粒嘅灰塵掃走,然後將冷氣機清潔劑均勻咁噴喺表面上,等佢完全沾滿泡沫後靜待十至十五分鐘,呢啲泡沫會慢慢將灰塵溶解。

(一般呢類清潔劑嘅味道都會較為濃烈,所以記得保持通風,有需要時戴返個口罩。) 之後再用水壺將清水直接噴上去,等啲污糟水經冷氣機嘅水喉排走。


4. 重開冷氣

清潔完之後再等多二十分鐘左右就可以重新裝返晾乾咗嘅隔塵網同外殼,重新開啟電源後就完成!洗完之後包部機凍好多,唔信您即刻試吓!


相信您睇完之後都會覺得洗冷氣唔係一難事,但如果有其他功能上嘅問題,又或者真係太污糟嘅話,建議您都係搵返專家去解決啦!講起專家,您又知唔知唔係間間搬屋公司都會幫您搬冷氣機嘅呢?如果係窗口式嘅冷氣機,裝拆上都需要特定技巧,而且過程較為繁複,所以您搬屋想搬埋冷氣機嘅話,記得問清楚搬屋公司做唔做到,同埋會唔會幫您裝埋先!