原來紙箱、膠紙可以咁用?搬屋用具清單大公開!


唔少人為咗慳錢,都會選擇自己搬屋,但係究竟搬屋要用咩工具呢?紙箱、板車、bubble紙、膠紙呢啲又有咩用途?邊啲物料係必須嘅呢?等我哋話您知啦!


搬屋紙箱

講到搬屋嘅必需品,相信大家第一時間都會諗起紙箱或者紅白藍袋啦。兩樣嘢嘅主要作用都係用嚟裝雜物,而紙箱仲有其他用途添!例如如果您要搬電視機、梳化、雪櫃等等傢俬及電器嘅話,您可以將紙箱拆用,用紙皮去包住四個角或者梳化腳,用嚟防撞同防止刮花。如果係電視機嘅話,仲可以用紙皮包住螢幕,有保護作用之餘仲可以防塵添!


而最適合搬屋用嘅係21吋x14吋x15吋左右嘅雙坑紙箱,保護性夠強,個size亦都適合任何人搬動。建議每個紙箱嘅重量都要維持喺15-25kg左右,太重嘅話有機會喺搬動時傷及腰部,亦有可能整穿紙箱個底。


板車

搵過搬屋公司搬屋嘅朋友都應該發現佢哋會有好多板車。板車有好強嘅承重力(超過300kg),無論係雪櫃定洗衣機,都可以輕鬆推走!如果您唔係專業搬屋師傅嘅話,建議您擺4-6個紙箱上板車,用膠紙綑綁住佢哋以防走位後可以推走。


封箱膠紙

喺搬屋界嚟講,膠紙同紙箱幾乎就係最萬能嘅配搭。記得買5-7cm闊嘅封箱膠紙,同埋唔好貪平買啲太薄嘅牌子!膠紙最基本嘅用途當然係封箱啦,視乎重量會有唔同嘅包法,最基本嘅包法就係貼落紙箱嘅開口位,擔心唔夠承托力嘅可以再封多一層上去。


除咗用嚟封箱之外,其實膠紙仲可以當繩用!有啲人會用二手紙箱,二手紙箱嘅質素未必太好,有機會喺疊咗其他紙箱/家具上上面時,最底個箱會塌咗落嚟,重新搬過啲嘢落嚟再砌過又浪費時間同體力,呢個時候您可以將膠紙頭痴喺塌咗嘅紙箱嗰一邊,然後用力向反方向拉,再將膠紙尾貼喺另外一個紙箱/家具上,借膠紙嘅力去拉起塌咗嘅紙箱。


Bubble 紙、珍珠棉、報紙


Bubble紙(即氣泡紙)同珍珠棉都係用嚟保護一啲廚具、電器、紅酒等易碎物品,只要包得好,遇上一般嘅碰撞時都唔怕爛同碎。而當您要疊好一啲碗碟要包嘅時候就需要用到報紙啦,喺疊上每一個碗碟前都擺一張報紙做底,就可以防止佢哋互相碰撞,起緩衝作用。


其實專業嘅搬屋工具仲有好多,有啲更需要專業師傅先識用,如果您發現自己有搬唔郁、包唔到嘅嘢時,千祈唔好夾硬嚟,搵搬屋公司幫手最實際,如果唔係真係好易受傷!

  • Facebook
  • Instagram
  • YouTube

© 2020 Moving Formula - All Rights Reserved