唔洗搵通渠佬!塞水渠可以點做?


通渠的方法

相信好多屋企都遇過塞水渠呢件事,但係往往都唔知點解會塞、塞咗又應該點解決好!搵通渠佬又要洗一筆錢,究竟點樣先可以平靚正咁通返條渠呢?


塞渠嘅原因

水渠分有好多種,例如馬桶、浴缸、洗手盆、甚至係普通廁所及廚房嘅去水位等等,幾乎每一條渠都有機會塞!但係點解會塞呢?其實每個渠淤塞嘅原因都係不外乎有物件、物料阻塞,而每個水渠嘅阻塞物都係差唔多,例如浴缸、企缸等浴室去水位最常見嘅阻塞物就係頭髮及油脂嘅積聚等等。要通渠嘅話,第一步當然要知道大概俾咩塞住咗,先可以對症下藥嘅。


塞水渠的原因

U型水渠

好多屋苑嘅浴室水渠都係U型,作用係用嚟阻隔一啲病毒、細菌、昆蟲、臭味等通過水渠而進入室內。但係U型水渠需要有一定嘅儲水先可以發揮功效,太多水式太乾嘅話,就有機會導致雜物阻塞,或者令條渠失去水封嘅壓力,導致一啲氣體傳入室內,03年德福花園爆發SARS同青衣長康邨康美樓嘅新冠肺炎嘅個案,都係因為U型水管有病毒而傳到大廈嘅單位內。所以水渠嘅清潔係好重要。


水渠保養

其實就算無淤塞都好,水渠都應該要定期就保養及清潔。方法好簡單,建議每星期倒500毫升嘅水落所有排水口,保持U型水管有足夠儲水。另外最好就每日用1:99稀釋漂白水去清潔廁所及馬桶,並保持廁所通風,唔好淨係開抽氣扇,要開窗。如果水管有生銹、漏水、臭味傳出等問題嘅話,可以搵專家處理。


水渠的保養

通渠方法

如果發現水管有淤塞或去水較慢嘅情況,您就需要通渠,唔想搵通渠佬,不妨試吓以下呢幾招:


通渠用什麼工具

1. 通渠鐵線/彈弓

作為最天然嘅物理通渠方法,用鐵線/彈弓係需要高超嘅技巧先可以做到㗎!一般五金舖都有賣通渠嘅鐵線/彈弓,再唔係直接買一條約4米長嘅普通鐵線,扭埋一齊,直徑大約0.5-1毫米就得。做法就係直接將鐵線插落渠內,遇到阻塞物時用力拉出嚟即可。


2. 梳打粉

相信大家都知梳打粉可以去油,而渠嘅阻塞物都有唔少係油脂!做法就係先倒熱水落水管,然後倒大量嘅梳打粉+適量白醋,(梳打粉遇上醋時會產生大量二氧化碳氣體同一定嘅溫度,可以利用氣體逼走淤塞物嘅同時亦希望透過兩者產生嘅化學作用去分解油脂等。)最後再倒多次熱水落去就得,唔得嘅話就試多幾次!但係要注意嘅係呢個方法係去唔到頭髮㗎!


3. 通渠水

如果天然方法唔得嘅話,唯有用化學攻擊!由於通渠水通常係強酸或者強鹼嚟,所以用嘅時候一定要戴手套同避免接觸到皮膚及眼睛!通渠水係可以溶解油脂、纖維同頭髮等阻塞物。而通渠水嘅用法就係將佢直接倒落淤塞水渠(千祈唔好一次過倒大量嘅通渠水,以免傷到渠!),然後等一段時間後倒入清水即可,如果唔得嘅話再試多幾次。


4. 哥士的

有返咁上下年紀嘅朋友都應該聽過曾sir推介嘅哥士的㗎啦!形狀多數係呈粒或片狀,一般五金鋪都買到。由於哥士的嘅腐蝕性極強,所以用嘅時候要好小心,戴好膠手套同眼罩!用法係將適量哥士的粒/片倒落淤塞渠口,然後再倒適量熱水去溶解哥士的,再等一段時間後,再沖大量清水,直接沖走分解咗嘅淤塞物同哥士的,同樣唔得嘅話可以試多幾次!要注意嘅係哥士的係唔可以同漂白水、雙氧水一齊使用,如果唔係會爆炸!


其實坊間仲有好多唔同嘅通渠方法,建議您可以先用啲天然溫和嘅方法試吓先,唔得嘅話再用通渠水/哥士的,再唔得嘅話唯有真係要搵通渠佬幫手啦!想唔塞渠嘅話就記得定時做清潔,千祈唔好以為直接沖走啲頭髮就冇事!