大多搬屋公司都係譭譽參半?同您拆解搬屋嘅黑名單!


搬屋黑名單

香港有最少過百間大大細細嘅搬屋公司,上網搵搬屋推介都要揀足幾日,揀啱嗰幾間總係會有人話佢係黑店,究竟點樣分辨邊啲係搬屋黑店邊啲唔係呢?點樣做先可以避免中伏呢?

搬屋公司

大型搬屋公司

規模較大嘅搬屋公司通常會有幾隊車隊,無論係師傅定話貨車數量都比普通公司多。呢類公司通常係歷史較為悠久,或者係外資公司。而佢哋嘅優點就係

業務較廣,無論搬屋、搬寫字樓、存倉、移民搬屋等等都能提供相關服務,而報價單同收據等都做得比較仔細及專業,經驗亦都較為豐富。

正正就係因為佢哋營運經驗豐富,對於一啲搬屋同公司業務嘅流程有一套固定做法,習慣咗呢套模式嘅同時,亦會忽略咗照顧客人嘅需要。有啲公司嘅做法係將前線工作外判出去,例如將送紙箱、搬屋團隊等外判出去,好處就係可以減輕好多金錢同時間成本,處理每張單嘅效率更高;而壞處就係冇辦法控制前線師傅嘅質素,如果太多學徒或新人喺同一隊嘅話,有機會影響到搬運嘅質素。所以您會喺網上見到有人會讚呢啲搬屋公司嘅同時,亦有唔少人會俾劣評佢哋。質素難以控制,客人自然有機會要「撞手神」。

小型搬屋公司

至於規模較細嘅搬屋公司,佢哋多數係由1-2隊搬運團隊組成,由報價去到搬運都係同一班人去負責,優點就係佢哋嘅班底大多數係固定,質素比較容易控制得到,而且有啲老細同時會兼任埋領隊,由報價到搬運都係親自落手落腳做埋,比較熟悉每一張單、每一個客人嘅需要,溝通更為直接。

同大型搬屋公司相比,佢哋可能冇咁多營運嘅經驗,一多起單上嚟,就有機會

出現唔夠人或者有機會要「趕工」等情況。喺呢啲情況下,即使員工有經驗同技術都好,都唔能夠完全保證到搬運嘅質素。

總括嚟講,大公司定細公司都有各自嘅優缺點,所以揀搬屋公司都係視乎自己嘅真正需要,揀一間最啱自己嘅公司就最好。如果想做多兩手準備,保障返自己嘅不妨睇埋我哋嘅建議啦!

留意附加費

每間搬屋公司都會有自己嘅計算方式,作為一個精明嘅消費者就一定要留意!

1. 搬屋小費(貼士/茶錢)

今時今日,絕大部份搬屋公司都唔會主動要求客人俾貼士㗎啦。所有小費都係應該由客人自己決定俾定唔俾。

2. 樓梯、轉平台費、斜坡費

如果您嘅新居/舊居係唐樓、村屋、有平台嘅屋苑等就要留意,搬屋公司會按照樓梯嘅數量去加錢,基本上係以樓層嚟計,實際計法就每間公司都唔同。留意返搬運時有平台要轉、有斜坡嘅話亦都有機會加收費用。

3. 泊車費及路程費

搬屋前問清楚管理處有冇提供免費泊車嘅服務同時間,如果冇嘅話就要由客人去俾泊車費。另外,如果您嘅大廈門口唔能夠泊車,又或者需要泊遠啲嘅話,搬屋公司亦會向您收取路程費。

4. 特殊物件搬運費

如果您有鋼琴等大型傢俬或物件要搬嘅話,費用會有所提高,不過通常搬屋公司喺報價時已經計算在內,您亦都可以預先問清楚包定唔包。

5. 其他服務費

假如您需要傢俬裝拆、棄置垃圾、訂製保護箱、甚至使用吊車等服務嘅話,搬屋公司同樣會收取相關服務費。

6. 紙箱及包裝物料費

某啲搬屋公司會免費提供一定數量嘅紙箱及包裝物料,有啲就會按照您嘅需要,逐件同您計。

7. 紙箱超重費

一般紙箱、膠箱及紅白藍袋嘅重量建議係15-25kg 左右,超重嘅話搬屋公司會向您收取超重費用。

8. 紅日及特殊天氣搬運費

注意有啲公司會喺紅日等特殊日子或時間提高收費。如果遇惡劣天氣時,例如紅雨、黑雨、3號風球以上等都會加收費用,甚至會更改搬運時間以策安全。

搬屋公司

報價單

搬屋公司嘅附加費用繁多,但其實大多數收費嘅類型都係合情合理,畢竟以上咁多種情況都會增加搬運成本。客人可以要求搬屋公司出一份完整嘅報價單,白紙黑字就唔怕蝕底!

留意返如果您想報價準確嘅話,一定要向搬屋公司如實提供所有資料,唔係嘅話佢哋有機會會加收費用。舉個例,如果您唔知道屋企樓下泊唔到車,貨車要泊喺另一條街嘅話,搬屋公司喺當日會向您加收泊車費。

購買家居保險

絕大部份搬屋公司嘅損壞賠償金額都係介乎$300-$5000左右。如果您有需要嘅話,可以自己或透過搬屋公司去買家居保險,又或者預先提醒佢哋有邊類物件需要特別處理。留意返一定要搵有營業牌照嘅公司,否則保險公司係唔會受保。