得嗰幾分鐘貨仔?儲水式電熱水爐使用秘技!


儲水式電熱水爐使用秘技

每逢冬天,總會有班人走出嚟圍爐,呻嘅唔係香港有幾「濕凍」,而係屋企得部「處死式」電熱水爐(儲水式電熱水爐)!究竟點解仲會有人用儲水式電熱水爐?有冇方法令到佢可以「持久啲」呢?

點解要折磨自己呀?

相信大部份儲水式電熱水爐嘅用家都會答您:「有頭髮邊個想做癩痢?」其實佢哋都係因為眾多限制,所以先用唔到其他類型嘅熱水爐,所以唔好再笑佢哋啦。

熱水爐種類及限制

1. 氣體式熱水爐

呢類熱水爐即係用燃氣嚟加溫,分有煤氣同石油氣兩種,由於佢係即開即熱嘅關係,所以係唔需要儲水,體型較細。缺點就係唔係間間屋都裝到,一啲舊式嘅大廈,例如最少20幾年樓齡嘅唐樓等,本身係冇煤氣喉嘅就裝唔到啦。

2. 即熱式電熱水爐

同樣都係即開即熱、冇儲水箱、體積較細,同氣體式熱水爐嘅最大分別就係佢係用電嘅。但同煤氣一樣,唔係間間屋都裝到,因為即熱式電熱水爐需要較大電力,所以一定要用採用三相供電,不過而家好多新落成嘅屋苑都係用三相,所以唔需太擔心。

3. 速熱式電熱水爐

作為第三代電熱水爐,佢嘅加熱速度比起傳統儲水更快,5分鐘就可以上到40度,而且耗電量較即熱式低,大部份屋苑都裝到。

4. 傳統儲水式電熱水爐

聽到個名都打冷震!一般開電掣後15-20分鐘先完全加熱,而熱水量就視乎儲水箱大細而定。喺消委會2018年嘅調查報告指出,某啲款式嘅儲水式電熱水爐持續供應熱水嘅最短時間只係得3.9分鐘!基本上係濕完個身後,洗頭水都落唔切就可以抹返乾,然後等佢再煲返20分鐘…

以下係筆者搜集返嚟嘅幾招小技巧,希望可以幫到大家盡量持久啲…

熱水爐

1. 細水長流大法

水箱嘅水量決定一切,先開凍水再開熱水,千祈唔好扭咁大熱水掣,寧願慢慢開同調較水溫!

熱水爐

2. 沖涼洗頭二重奏

如果您有時間,同時又想全程用熱水嘅話,建議您可以沖完涼後再等佢煲返一陣先洗頭。因為洗頭未必需要咁大量嘅熱水,唔洗等足20分鐘之餘又可以有暖水洗頭。

熱水爐

3. 硬件升級

與其長時間受凍水折磨,倒不如用多少少錢,直接升級硬件,換返個最新型號嘅速熱式電熱水爐,長痛不如短痛。如果您屋企連速熱式電熱水爐都裝唔到嘅話,至少都揀返個可以降低流量嘅花灑,減少耗水量。

絕技就肯定唔只得咁少㗎啦,相信沖咗幾十年儲水式凍水涼嘅朋友比筆者更有經驗!歡迎各位分享出嚟,互相幫助幫助!希望大家注重身體,唔好冷親!