打破都市傳說?農曆新年唔搬得屋?



成日聽啲老人家講:農曆新年千祈唔好搬屋呀!甚至成個正月都唔適宜搬屋㗎!如果單憑風水嚟講,呢個說法啱唔啱呢?但農曆新年又的而且確係搬屋嘅淡季,原因係點嘅呢?


農曆新年真係不宜搬屋?

如果以風水角度嚟睇,每個月都有啲日子係特別適宜搬屋嘅,只要打開通勝,凡有「宜移徙」同「宜安床」等字眼都適合搬屋,而今年嘅二月入面,有6日都有寫明係適宜搬屋嘅,包括3號、7號、12號、16號、24號同28號,其中12號更加係年初一添,即係話,原來新年都可以搬屋!


當然通勝都只係作參考之用㗎啦,如果要擇正吉日吉時搬屋嘅話,最好都係搵返風水師傅去幫您手,始終每個人嘅風水命理都唔同!



咁點解農曆新年比較少人搬屋呢?

農曆新年係中國嘅傳統習俗嚟,就算嚟到現今世代,中國人每逢新年都仲會去拜年、探親、過節等等。如果喺正新年搬屋嘅話,就有機會因為忙於搬屋而少咗慶祝新年、與親友相聚嘅時間,而且新屋未收拾好嘅話,親友上嚟拜年都會唔方便添!仲有一個原因就係,香港農曆新年嘅公眾假期普遍得4日左右,難得放大假就當然放鬆吓,唔想煩搬屋嘅嘢啦!


如果您係唔信風水命理嘅話,搬屋最好就係揀啲方便自己嘅日子啦!話哂搬屋都係一件大事,揀啲自己放假嘅日子同時間搬屋,可以同師傅溝通多啲,睇住成個個流程,點都放心啲啦!但係如果您想揀喺吉日搬嘅話,記得提早搵搬屋公司,越早越好,尤其係吉日+紅日添!因為通常呢啲日子都比較旺,太遲搵搬屋公司嘅話有可能full哂㗎!


以下係2021年二月同三月分嘅搬屋吉日俾大家參考一吓:

二月:3/2,7/2,12/2,16/2,24/2,28/2

三月:2/3,6/3,12/3,18/3,27/3,28/3


今日係年廿九,過多兩日就新年啦!Moving Formula喺呢度祝大家身體健康、事事順利、心想事成!
  • Facebook
  • Instagram
  • YouTube

© 2020 Moving Formula - All Rights Reserved