準備大掃除?四招幫您實踐斷捨離!

仲有三日就係年廿八,係時候又要洗邋遢啦!每逢呢個時候,執嘢同掉嘢都係一件好麻煩嘅事,唔知由邊度開始,又唔知點樣開始…如果您都遇到咁嘅情況嘅話,不如試吓跟大師學吓嘢啦!



斷捨離

「斷捨離」原本係沖道瑜珈始創人沖正弘提倡嘅瑜珈理念,之後由山下英子宣揚開去。「斷」即係斷絕一啲不必要嘅物品,「捨」係指捨棄多餘嘅物品,「離」就係反覆執行「斷」同「捨」呢兩個步驟,從而放低對物品嘅執著。透過「斷捨離」嘅過程,每個人可以更加了解自己。


第一招:究竟我需唔需要?

喺執屋嘅期間見到每一件物件時嘅第一步就係問自己:「我需唔需要佢?」,得到答案之後您會發覺,原來好多嘢都唔係想像中咁重要,甚至完全唔再需要嗰啲物件,尤其係執衣櫃時,您一定會遇到好多呢啲情況。


第二招:買自己所需

好多人會俾減價同優惠吸引咗去買嘢,但係冇諗過舊嘅都未用哂,買返嚟都係擺!如果您想買嗰件物品,首先要三思而後行,消耗品要用哂舊嘅先好買,減價幾時都有,唔需要急於一時!


第三招:善用收納空間

收納係一個可以幫助到物件分類、節省空間嘅方法。首先劃分兩個空間,包括:經常使用同埋較少使用嘅空間。將經常隨身攜帶嘅物品放埋一齊,最好放喺當眼處,而較少使用嘅物品就可以擺埋一邊。另外仲可以設立一個「唔知要唔要」嘅區域,將未知要唔要保留嘅物件暫放喺度。


第四招:果斷分手

千祈唔好俾「可能遲啲會有用」呢個諗法主宰自己,好多時就係因為「可能遲啲會有用」買咗,之後就從來都冇用過!有嘢想買時,記得問清楚自己究竟係咪有即時需要先好買。如果有兩樣相同嘅物品,不妨捨棄其中一個!


臨近新年,執屋嗰陣總係特別煩,但係執完包您心曠神怡!認清楚自己嘅需要之後就唔會再重覆犯錯!有嘢唔要嘅不妨捐出去,比起擺喺屋企霸住啲位,不如捐俾有需要嘅人仲更加有意義啦!

  • Facebook
  • Instagram
  • YouTube

© 2020 Moving Formula - All Rights Reserved