逐件計一定平啲?拆解搬屋公司嘅收費迷思!


搬屋公司的收費迷思

上網搵搬屋公司果嗰陣總係唔明白究竟佢哋嘅收費係點計法,見到逐件計嗰啲好似比較明碼實價啲,但係咪平啲又真係唔知!究竟搬屋公司係點樣計錢嘅呢?


有人話逐件計一定平啲,係咪真㗎?

首先您要了解搬屋公司嘅收費模式究竟係點,假設我哋將佢分做逐件計同埋一次性嘅收費,逐件計即係搬屋公司會將所有收費項目細分,包括每種傢俬、電器、紙箱、包裝物料、貨車等等都有各自嘅價錢,而呢啲價錢通常會標咗喺公司嘅網站上面,客人剔好哂所需嘅服務後就會有個價錢出嚟做參考。


而普遍搬屋公司嘅收費就係需要報價人員同客人進行溝通,以網上提供要搬嘅傢俬雜物照片或影片嘅模式,或者直接上門去報價,其實原理都係一樣,佢哋都係按照客人所需要嘅服務而去定個價錢。


簡單啲嚟講,兩種報價方式都係以傢俬、電器、雜物數量及所需服務去收費,即係話個差別只係在於公司嘅成本同利潤。逐件計嘅搬屋公司可以喺傢俬價錢收平啲,但車費就收貴啲,而相反,其他搬屋公司亦都可以喺車費度收平啲,所有嘢都係經佢哋公司嘅計算方法去決定。建議您可以搵哂兩種公司去報價,然後比較一吓價錢、所包嘅服務、聲譽後再做決定。


有人話啲逐件計嘅公司係普通物流公司而唔係搬屋公司?

的確近年係多咗物流公司轉型又或者擴張,做埋搬屋呢一範。但係咁樣唔代表佢哋係唔專業嘅,如果佢哋嘅前線係一班有豐富經驗嘅搬屋師傅,一樣都可以做得到。反而留意返一啲只係提供運輸服務嘅公司,又或者係一啲call貨車嘅平台,有機會只係幫您將物品車去目的地樓下就算!所以揀公司時要留意返佢哋提供咩服務先得㗎!


成日都話搬屋公司會加價,點樣先可以保障到自己?

好多人以為搬屋公司加價就一定係黑店,但事實上客人都有責任,尤其係而家網絡資訊咁流通,如果搬屋公司亂咁加錢,恐怕佢哋都唔洗旨意做生意啦!通常呢類嘅糾紛都係搬屋公司同客人溝通上有誤差,例如客人屋企大堂前有樓梯,但冇話俾搬屋公司知,咁去到當日要加價都無可厚非。


要保障到雙方嘅,就一定要白紙黑字做證明,例如要求搬屋公司出一份報價單俾您,寫明包咗啲咩服務,有問題時雙方都有依據,咁就唔怕遇到黑店啦。當然如果有啲突發情況,例如師傅去到現場後,客人要求搬多一張梳化,又或者喺搬傢俬時先發現需要做裝拆嘅話,正常搬屋公司會同客人講聲先,如果冇嘅話,客人都最好問一聲會唔會額外收費,等大家有共識先再做。